Vitaminləri günün hansı saatında qəbul etmək lazımdır?
- 2024.05.02 18:17
- 1709 Baxış
Vitamin və qida əlavələri getdikcə populyarlaşır. Demək olar ki, hər kəs ən azı bir vitamin və ya mineralın əskikliyindən əziyyət çəkir.
Kimi stressdən, kimi sümük problemlərindən, kimi də yuxusuzluqdan xilas olmaq üçün vitaminlərə üz tutur.
Bəs vitaminləri günün hansı vaxtı qəbul etmək daha doğrudur?
Medicina.az xəbər verir ki, nutritionist Suman Agarval və Dr. Vişaka Şivdasani C vitamini üçün günün ən yaxşı vaxtının səhər yeməyindən sonra olduğunu söyləyirlər. Çünki C vitamini stimullaşdırıcıdır və günün gec saatlarında qəbul edilərsə, gecə yatmağı çətinləşdirə bilər.
Sitrus meyvələrində, pomidorda və kartofda olan C vitamini ümumi sağlamlıq üçün vacibdir, lakin bəzi ekspertlər bunu əlavə şəklində qəbul etməyin lazım olub-olmadığına hələ də dəqiq cavab verə bilmirlər.
Bədənin qan damarlarının, qığırdaqların, əzələlərin və kollagenin qurulması üçün C vitamini lazımdır. Həm də hüceyrələri xəstəliklərdən qorumağa kömək edir və immunitet sağlamlığını dəstəkləyir.
Balıq yağı və Omeqa-3 üçün ən yaxşı vaxt nahardan sonradır. Əlavənin qida ilə qəbulu udulmanı artıra və ürək bulanması, gəyirmə, mədə narahatlığı kimi xoşagəlməz əks təsirləri azalda bilər.
Omeqa-3 yağ turşuları ürək sağlamlığını dəstəkləyə bilən "sağlam yağlardır". Onlar, həmçinin trigliserid səviyyələrini aşağı salmağa kömək edirlər. Qanda trigliseridlərin çox olması ürək xəstəliyi və insult riskini artırır.
Dəmiri acqarına qəbul etmək daha yaxşıdır. Dəmir boş bir mədədə ən yaxşı şəkildə sorulur. Qida isə onun udulmasını azaldır.
Mütəxəssislər dəmiri yeməkdən ən azı bir saat əvvəl və ya iki saat sonra qəbul etməyi məsləhət görürlər.
B-kompleks vitaminini isə günün birinci yarısında qəbul etmək məsləhət görülür. Vitamin B kompleksi səkkiz B vitaminindən ibarət məhsuldur: B1, B2, B3, B5, B6, B7, B9 və B12. Hormon istehsalı, iştah və enerji kimi məsələlərdə kömək etdiyi düşünülür.
Qida mübadiləsində və enerji istehsalında oynadıqları rola görə, onlardan maksimum fayda əldə etmək üçün səhərlər qəbul etmək tövsiyə olunur.
Maqnezium son vaxtlar rahat yuxunun və güclü əzələlərin sirri kimi təqdim edilir. Daha yaxşı yuxu və istirahət üçün yatmazdan 15 dəqiqə əvvəl qəbul etmək lazımdır.
Kalsiumdan maksimum fayda əldə etmək üçün isə onu qida ilə, xüsusilə sardina, portağal, göbələk və süd kimi D vitamini ilə zəngin qidalarla qəbul etmək məsləhətdir. Çünki bu qidalar kalsiumun udulmasına kömək edir.
Aysel
Ən Çox Oxunanlar
Yeni Xəbərlər
