Turistlər Azərbaycana gəlməkdən imtina edir -Otellər boşalır

2020.03.04 15:43
3144 Baxış

“Azərbaycana gəlməyi planlaşdıran turistlər koronavirus epidemiyasına görə hotellərimizdən rezervi ləğv edirlər”.

Medicina.az xəbər verir ki, Turizm Assosiasiyasının (AzTA) rəhbəri Nahid Bağırov bildirib.

“Bu problemin tək Azərbaycanın turizm sahəsinə deyil, bütün dünyaya təsiri var. Bu virusa görə insanlar nəinki öz ölkəsindən, hətta evlərindən kənara çıxmağa çəkinirlər. Bu zaman hansı turizmdən söhbət gedə bilər? Bu ərəfədə ölkələrdə turizmlə bağlı artım olacağına inanmıram”.

Ekspert bildirib ki, koronavirus epidemiyasının aşkarlanması Azərbaycanın da turizminə təsir edəcək:

“Hər il Novruz bayramında ölkəmizə çox turist gəlirdi. Onların əksəriyyətini iranlılar təşkil edirdi. Vəziyyət koronavirusla bağlı ürəkaçan olmadığı üçün Azərbaycana turistlərin gələcəyinə inanmıram. Biz də istəmirik ki, virusun yayıldığı ölkədən bizə turistlər gəlsin. İlk növbədə vətəndaşlarımızı qorumalıyıq”.

“Koronavirus epidemiyasına görə Azərbaycandan da xarici ölkələrə səfərə gedənlərin sayı azalıb. Bayramda tətil günlərində uzaq səfərə çıxanlar olur. Bununla bağlı da ölkədən getmək üçün bilet alanların sayında azalma müşahidə olunur”, - deyə N.Bağırov qeyd edib.

O əlavə edib ki, Azərbaycanda yerləşən bütün hotellərdə virusa görə imtina var:

“Burada beş, dörd, üç ulduzlu, hostellər, eyni zamanda, turistlərin kirayələdikləri evlərdən də imtina edənlər var”.