TƏBİB sədrindən vətəndaşlara müraciət: Vaksindən sonra 30 dəqiqə...
- 2021.01.19 12:24
- 2441 Baxış
“Medicina” xəbər verir ki, bunu Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri Ramin Bayramlı deyib.
O qeyd edib ki, ölkəyə gətirilən hər bir partiya vaksin laboratoriya sınaqlarından keçirildikdən sonra istifadəyə qəbul edilir: “Ölkəmizə gətirilən vaksin seriyası Türkiyə Səhiyyə Nazirliyinin nəzdində fəaliyyət göstərən Əczaçılıq qurumunun laboratoriyalarında iki həftəlik analiz prosesindən uğurla keçib. Bundan sonrakı növbəti partiyalar da bu qaydada yoxlanılacaq”.
R.Bayramlı koronavirus əleyhinə vaksinin yan təsirlərinin olması barədə iddialara da münasibət bildirib: “İlk mərhələdə seçdiyimiz inaktiv vaksinlərin əlavə təsirləri daha azdır. Əlavə təsirlər baş ağrısı, yüngül qızdırma və bəzən də halsızlıq ola bilər. Hər bir şəxs vaksindən sonra 30 dəqiqə müşahidə altında saxlanılır. Eyni zamanda əks təsirlər barədə onlara verilən məlumat kitabçasından istifadə etməklə ərazi üzrə poliklinikalarına müraciət edə bilərlər”.
Onun sözlərinə görə, hazırda digər vaksin istehsalçıları ilə də danışıqlar aparılır və ehtiyac olarsa digər növ vaksinlərin də ölkəyə gətirilməsi mümkün olacaq.
Koronavirusun mutasiyaya məruz qalan növünə hələ Azərbaycanda rast gəlinməsə də TƏBİB sədri qeyd edib ki, vaksin virusun bu ştammına qarşı da təsirlidir: “Azərbaycana gələn bütün şəxslərin COVID-19 testindən keçirilməsi koronavirusun mutand ştamlarının ölkəmizə girişinin qarşısını əhəmiyyətli dərəcədə alıb. Əgər belə hal aşkarlanarsa əlavə tədbirlər görüləcək və bu barədə ictimaiyyət məlumatlandırılacaq”.
R.Bayramlı həmçinin vətəndaşları sosial şəbəkələrdə TƏBİB adından yayılan yalan məlumatlara inanmamağa çağırıb: “Yalnız rəsmi məlumatlara etibar etsinlər. Səhiyyə işçiləri üçün vaksin tunel ucunda görünən işıq kimidir və hər kəsi vaksinasiya olunmağa dəvət edirəm”.
Ən Çox Oxunanlar
Yeni Xəbərlər
