Şirvan Şəhər Doğum Evi xəstədən rüşvət tələb edib? - AÇIQLAMA
- 2021.05.24 13:56
- 5866 Baxış
Salyan sakini Şirvan Rayon Mərkəzi Xəstəxanasının tabeliyində olan Şirvan Şəhər Doğum Evindən şikayətçidir.
Medicina.az oxu.az-a istinadən xəbər verir ki, bu barədə şikayət sosial şəbəkədə paylaşılıb.
Paylaşımda iddia edilir ki, Salyan rayonu Qarabağlı kənd sakini İmanova Sevanə Rüzgar qızı bir neçə gün öncə Şirvan Rayon Mərkəzi Xəstəxanasının nəzdində fəaliyyət göstərən Şirvan Doğum Evində əməliyyat keçirib.
Əməliyyat müqabilində vətəndaş tibb müəssisəsinə 500 AZN ödəyib. Xanımın həyat yoldaşı E.İmanov S.İmanovanı xəstəxanadan çıxarmaq istəyəndə həkimlər buna imkan verməyiblər. Səbəb olaraq isə xəstəyə Qan Bankından qan götürüldüyünü və bunun müqabilində pulun ödənilməli olduğu deyilib.
Vətəndaş isə ödədiyi 500 AZN vəsaitə bu pulun da daxil edildiyini və ondan istənilən əlavə məbləğin rüşvət olduğunu iddia edir.
Paylaşım sosial şəbəkədə ciddi müzakirələrə səbəb olub, rüşvət iddiaları isə hələ də cavabsız qalıb.
Məsələyə aydınlıq gətirilməsi üçün Şirvan Şəhər Doğum Evi ilə əlaqə saxlanılsa da, qurumun saytında qeyd edilən telefon nömrələrinin heç birindən cavab almaq mümkün olmayıb.
Daha sonra Şirvan Şəhər Doğum Evinin baş həkiminin otaq nömrəsi ilə əlaqə saxlanıldı. Nömrəyə baş həkiminin köməkçisi cavab verdi və baş həkimin yerində olmadığını bildirdi. Məsələ ilə bağlı mövqe öyrənmək üçün əlaqə nömrəsi qoyulub.
Əlaqə nömrəsinə isə baş həkim yox, sözügedən məsələdə adı hallanan İmanova Sevanənin anası İmanova Badisəba Şahbala qızı zəng etdi.
Sevanənin anası isə açıqlamasında bildirib ki, qızı haqqında yayılan iddialar əsassızdır:
“Mənim qızım 1999-cu il təvəllüdlü İmanova Sevanə Rüzgar qızı beş gün bundan öncə Şirvan Şəhər Doğum Evində daxili qanaxmadan əməliyyat olunub. Qızımı ağır vəziyyətdə Salyandan Şirvana gətirmişik, xəstəxanada qızımı əməliyyat edib həyata qaytarıblar. Qızıma əməliyyat zamanı qan köçürülüb. Mən onun anasıyam, məndən yaxın ona heç kim yoxdur. Qan Bankından qan götürülüb, mənə də deyildi. Oğlumun dostları gəldi, qan verdilər, məsələ həll olundu. Bizim xəstəxana ilə heç bir problemimiz yoxdur, əsassız iddialar yazılmasın. Xəstəxana ilə kiminsə problemi varsa, özü həll etsin, mənim qızımın adını hallandırmasınlar”.
Ən Çox Oxunanlar
Yeni Xəbərlər
