Səhiyyə naziri tibb kolleclərinin rəhbərlərini yığdı
- 2022.11.15 17:56
- 1148 Baxış
Səhiyyə Nazirliyində tibb kolleclərinin rəhbərləri ilə görüş keçirilib.
"Medicina" xəbər verir ki, clasda çıxış edən səhiyyə naziri Teymur Musayev Azərbaycanda orta tibb təhsilinin şərəfli tarixə malik olduğunu bildirib.
“Lakin əldə olunan nailiyyətlərlə yanaşı, çətinliklər də mövcuddur və biz bütün diqqətimizi onların həllinə yönəltməliyik. Bizim üçün əsas məsələ - tibb təhsilinin keyfiyyətinin yüksəldilməsi, inkişafının təmin edilməsi və ən əsası savadlı kadrların hazırlanmasıdır. Bu məqsədlə nazirlik respublikanın tibb kolleclərinə hər cür köməklik göstərməyə hazırdır”.
Nazir çıxışında Azərbaycanda səhiyyə sahəsinin maddi-texniki bazasının gücləndirilməsi üçün dövlət səviyyəsində zəruri addımlar atıldığını vurğulayıb:
“Məhz bu dəstəyin nəticəsidir ki, son illərdə ölkəmizdə yüzlərlə tibb müəssisəsi tikilib istifadəyə verilib”.
İlkin səhiyyə xidmətlərinin inkişaf etdirilməsi üçün tibb işçilərinin, xüsusilə tibb bacılarının intensiv təlimlərə cəlb edilməsinin vacibliyini vurğulayan Teymur Musayev Səhiyyə Nazirliyinin təşəbbüsü ilə gələn il Ümumdünya Səhiyyə Təşkilatı tərəfindən Simulyasiya və Təlim Mərkəzinin yaradılacağını bildirib:
“Simulyasiya və Təlim Mərkəzinin yaradılmasında əsas məqsəd tibb işçilərinin bilik və bacarıqlarının artırılması, eyni zamanda yerli təlimçilərin yetişdirilməsidir”.
Nazir ölkədəki tibb kolleclərində mövcud problemlərin monitorinqi üçün işçi qrupunun yaradılacağını vurğulayıb:
“Bununla yanaşı, tələbələrin intellektual qabiliyyətlərinin inkişafı bizim üçün çox vacibdir. Son onilliklərdə elmi nailiyyətlərə və onların imkanlarına maraq artır. Müasir informasiya texnologiyaları və rəqəmsal yeniliklər həyatımızı əhəmiyyətli dərəcədə dəyişir. Tibb elmi XX əsrin sonundan bəri rəqəmsal dünyaya sürətlə daxil olan ilklərdən biridir. Bütün bunları nəzərə alaraq, yaxın gələcəkdə Vahid Elektron Kitabxana Sistemi yaradılacaq və tibb kolleclərinin tələbə və müəllimlərinin istifadəsinə veriləcək”.
1 nömrəli Bakı Tibb kollecinin direktoru Nailə Əliyeva, 2 nömrəli Bakı Baza Tibb Kollecinin direktoru Dilarə Məmmədəliyeva, həmçinin regional tibb müəssisələrinin rəhbərləri kolleclərin fəaliyyəti, tədris prosesi və tələbələr üçün yaradılan şərait barədə məlumat veriblər.
Sonda Teymur Musayev tibb kolleclərinin rəhbərlərinə orta tibb təhsilinin müasir standartlara uyğunlaşdırılmasına dair tapşırıqlar verib.
Aygün M
Ən Çox Oxunanlar
Yeni Xəbərlər
