Enerji içkilərindən imtina edin, təhlükəlidir! RƏSMİ XƏBƏRDARLIQ:
- 2018.12.14 13:10
- 16980 Baxış
Enerjili içkilərin hamilə qadınlar və uşaqlar tərəfindən qəbul edilməsi qadağandır.
Bunu Medicina.az-ın soğrusuna cavab olaraq Qida Təhlükəsizliyi Agentliyi bildirib.
Qida Təhlükəsizliyi Agentliyi enerji içkilərindən 18 yaşa çatmamış yeniyetmələrin, hamilə qadınların, süd verən anaların, ürək-damar, psixonevroloji, böyrək və qaraciyər xəstəliklərindən əziyyət çəkən insanların istifadə etməməsini tövsiyə edib: "Enerji içkilərinin istehsalında istifadə olan kofein, şəkər, taurin, quarana kimi maddələr, rəngləyici qida əlavələri günlük normadan artıq qəbul edildiyi halda insan sağlamlığına müəyyən fəsadlar törədə bilər. Bu səbəbdən enerji içkiləri qəbul edərkən bir neçə məqama diqqət etmək lazımdır. Birincisi, məhsulu alarkən onun tərkibi ilə tanış olun. İkincisi, enerji içkilərinin gündəlik qəbulu 1 qutudan artıq tövsiyə olunmur. Üçüncüsü, enerji içkiləri spirtli içkilərlə birlikdə qəbul edilərsə, zəhərlənməyə səbəb ola bilər”.
Açıqlamada nəzərə çatdırılıb ki, enerji içkilərinin tərkibindəki şəkər tez bir zamanda qanla təmasa girir, oksidləşmə prosesində iştirak edir, əzələləri, beyni və digər həyati əhəmiyyət daşıyan orqanları enerji ilə təmin edir. Artıq dozada qəbul edildikdə qanda təzyiqin qəfildən qalxmasına və ya qanda şəkərin səviyyəsinin artmasına səbəb ola bilər: "Yüksək qan təzyiqi və qanda şəkərin artması, əsəbilik, yuxusuzluq kimi hallara gətirib çıxara bilər. Eyni zamanda enerji içkilərinin tərkibində olan kofein artıq istifadə edildiyi zaman insan orqanizmi üçün zərərlidir. Bu kimi hallar insanda asılılıq yaradır, yuxusuzluğa səbəb olur. Daimi olaraq kofein istifadəsi ürək döyüntülərinin sürətini artırır, təzyiqi yüksəldir”.
Bəs Azərbaycanda enerji içkiləri ilə bağlı laboratoriya analizləri aparılıbmı?
Qida Təhlükəsizliyi Agentliyi bildirib ki, Agentlik tərəfindən ölkədə istehsal olunan və ölkəyə idxal olunan qida məhsulları üzərində risk əsaslı nəzarət tədbirləri həyata keçirilir: "Məhsullardan götürülən nümunələr Azərbaycan Respublikasının Qida Təhlükəsizliyi Agentliyinin müvafiq laboratoriyalarında müayinələrdən keçirilir. Eyni zamanda Qida Təhlükəsizliyi Agentliyi əhalinin sağlamlığının qorunması istiqamətində mütəmadi olaraq monitorinqlər həyata keçirir. Monitorinqlərin nəticələri ictimaiyyətə açıqlanır. Respublikanın bütün regionlarında konkret faktlara əsaslanan müraciətlər daxil olduğu təqdirdə, Agentlik tərəfindən plandankənar (növbədənkənar) yoxlamalar aparılır. Həmçinin, enerji içkiləri ilə bağlı Agentliyə konkret faktlara əsaslanan hər hansı bir şikayət daxil olarsa, növbədənkənar yoxlamalar həyata keçirilir və adıçəkilən məhsul laborator müayinələrə cəlb olunur. Əgər vətəndaşların enerji içkilərinin tərkibi ilə bağlı hər hansı narahatlığı olarsa, bu barədə Agentliyin 1003 qaynar xəttinə zəng edib məlumat verə bilərlər”.
Bununla belə, Qida Təhlükəsizliyi Agentliyi artıq enerjili içkilərlərin zərərli təsirləri ilə bağlı əhalinin maarifləndirilməsi istiqamətində təşəbbüslərə başlayıb: "AQTA tərəfindən bu istiqamətdə kompleks tədbirlər həyata keçirilməkdədir. Həm sosial şəbəkələrdə, həm də kütləvi informasiya vasitələri ilə müxtəlif maarifləndirmə təbirləri görülür. Bunlardan biri də "Sağlam məktəbli” layihəsi çərçivəsində Bakı şəhərində fəaliyyət göstərən ümumtəhsil məktəblərində enerji içkilərinin ziyanları haqqında AQTA mütəxəssislərinin şagirdlərə ətraflı məlumat verməsidir. Qeyd edək ki, layihənin keçirilməsində məqsəd məktəblilər arasında qida təhlükəsizliyi anlayışının təbliğ edilməsi və şagirdlərə qida təhlükəsizliyi vərdişlərinin aşılanmasıdır”.
Qeyd edək ki, bu təhlükəli enerji içkilərinin istər mətbuatda, istərsə də sosial şəbəkələrdə böyük reklamı aparılır. Bunun nəticəsində azyaşlı uşaqlardan tutmuş yaşlılara kimi bu içkilər hər kəsə tanışdı.
Azərbaycanda daha çox "Hell”, "Bizon”, "Redbull”, "Monster”, "Jaguar” içkilərindən istifadə olunur. Bu içkilərin zəhərlənməyə, insanların sağlamlığına ağır zərbə vurmaları barədə dəfələrlə məlumatlar yayılıb, mediada faktlar tirajlanıb. Lakin buna baxmayaraq, enerji içkiləri istehlakı azalmaq əvəzinə artır...
Mövzunun davamı olacaq.
Azər
Medicina.az
Ən Çox Oxunanlar
Yeni Xəbərlər
