Qan uyğunsuzluğu xəstə uşaq doğulmasına səbəb ola bilər? - Mütəxəssis CAVABLANDIRDI
- 2018.06.01 15:09
- 15464 Baxış
Səhiyyə Nazirliyinin baş neonatoloqu, qurumun Neonatoloji xidmətin təkmilləşdirilməsi üzrə xüsusi komissiyasının sədri Rüstəm Hüseynov ər və arvadın qan qruplarının uyğunsuzluğu səbəbindən uşaqların vaxtından əvvəl, ölü və ya xəstə doğulması barədə deyilən fikirlərə münasibət bildirib.
Medicina.az trend.az-a istinadən bildirir ki, R.Hüseynovun dediyinə görə, ər və arvadın qan qrupları fərqli ola bilər. Lakin bu fərqlilik uşaqların vaxtından əvvəl, ölü və ya xəstə doğulmasına səbəb olmur. Buna görə də valideynlərin qan qruplarının uyğunsuzluğu səbəbindən uşaqların vaxtından əvvəl, ölü və ya xəstə doğulması barədə deyilənlər düzgün deyil.
Baş mütəxəssis qeyd edib ki, uşağın ölü, vaxtından əvvəl və ya xəstə doğulması digər amillərlə bağlıdır. Uşaq və ananın fərqli qan qrupları, rezus faktoru olduğu hallarda yalnız izoimunnalşma baş verdikdə (ana ilə döl arasında əlaqə yaradan ciftin funksiyası pozulduqda) uşaqlarda bir sıra problemlərə rast gəlmək olar.
R.Hüseynov deyib ki, əgər ananın qanı rezus mənfi, uşağın qanı rezus müsbət olarsa, onda qan uyğunsuzluğu - konflikti baş verə bilər və nəticədə uşağın səhhətində müəyyən problemlər ortaya çıxa bilər.
Nazirliyin baş mütəxəssisi bildirib ki, hazırda hamiləlik müddətində qan uyğunsuzluğu problemi olsa da, onun müalicəsi mümkündür.
Qeyd edək ki, molekulyar genetik Şirxan Musayev də bildirib ki, sovet dövründə "uşağın yarımçıq, ölü doğulmasının və ya düşük olmasının səbəbi ərlə arvadın qanı düz gəlmir, xromosomlarında uyğunsuzluq var" kimi fikirlər daha çox yayılmışdı.
Ş.Musayevin sözlərinə görə, heç bir ölkədə belə diaqnoz qoyulmur:
"Bu gün bu fikir Rusiyada da qəbul olunmur. Təəssüf ki, bizdə hələ də belə uyğunsuzluq diaqnozunu qoyanlar, buna görə müalicə yazan həkimlər var. Bizdə analizlər də göstərir ki, bir-birinə yaxın XY qrupların da normal uşaqları olur. İnkişafdan qalma, düşüklər isə tamam başqa səbəblərdəndir. Buna autoimmun xəstəliklər, xromosom patologiyaları, hətta yumurta və sperma səviyyəsində anormal xromosomlar, CRP paneldə laxtalanma problemi, genetik anomaliyalar səbəb ola bilər".
Ən Çox Oxunanlar
Yeni Xəbərlər
