""Omicron" yayılarsa, vaksinin effektivliyi azalacaq" - İnfeksionist
- 2021.11.29 14:22
- 1514 Baxış
İlk dəfə Cənubi Afrikada aşkarlanan COVID-19-un "Omicron" ştammı dünyaya yayılmağa davam edir. Artıq bununla bağlı, Yaponiya və İsrail xaricilər üçün sərhədlərini bağlayıb.
ÜST-ün məlumatına görə, "Omicron" ştammı çox yüksək qlobal risk yaradır və bəzi regionlarda ağır nəticələrə səbəb ola bilər.
Təşkilat 194 üzv dövlətə texniki məsləhət verərək, onları əhalinin yüksək həssas qruplarının vaksinasiyasını sürətləndirməyə çağırıb.
Bəs “Omicron” nədir, simptomları hansılardır? Azərbaycana da yayılma ehtimalı varmı?
Medicina.az xəbər verir ki, məsələ ilə bağlı Bakupost.az –ın suallarını infeksionist Mərdan Əliyev cavablandırıb.
Onun sözlərinə görə, yeni ştammın yayılması peyvəndin effektivliyini azalda bilər:
“Elmi adı “B.1.1.529” olan yeni ştamm (“Omicron) haqqında hələki ətraflı məlumat yoxdur. Virusun klinik gedişi çox ağır deyil, hətta “Delta” variantından daha yüngüldür. Amma fərqlilik yaşana bilər. Çünki virus hər ölkədə müxtəlif formalarda davam edir.
Məsələn, Afrikada günəş faktoru var. “D” vitamini orada daha yüksəkdir deyə virus yüngül keçirilə bilər. Yeni ştamm peyvənd olunmamış şəxslərdə aşkarlanıb. Ona görə də peyvənd olunanlara, bu virusun necə təsir göstərdiyi məlum deyil. Güman olunur ki, vaksinin effektivliyi azalacaq. Çünki bunun “spayk” proteinində dəyişikliklər var. Peyvənd isə “spayk” proteinə görə hazırlanır. Bu mutasiya “spayk” proteini üçün böyükdür.
Əgər vaksinin effektivliyi azalarsa, o halda peyvəndlərdə müəyyən dəyişikliklərin aparılmasına ehtiyac olacaq.
Qeyd edim ki, yeni çıxan “molnupiravir” dərmanının da eyni təsir göstərdiyi deyilir.
Yeni ştammın başqa xüsusiyyətləri və vaksinin tam olaraq hansı formada təsir göstərməsi hələki məlum deyil. Amma panikaya düşməyə ehtiyac yoxdur. Ən azından bilirik ki, bu ştamm çox ağır gedişli deyil. Ola bilər ki, yoluxuculuq qabiliyyəti yüksək olsun. Amma bəzən mutasiyalar pis yox, yaxşıya doğru gedir. Ümid edirik ki, bu virus, insan orqanizminə öyrəşməsilə əlaqədar olan bir mutasiyadır”.
Ən Çox Oxunanlar
Yeni Xəbərlər
