Koronavirusa yoluxmaların sayı artır - Kişilər daha böyük risk altındadır

2024.06.25 13:57
1086 Baxış

2019-cu ildə ortaya çıxdıqdan sonra qlobal epidemiyaya çevrilən və milyonlarla insanın ölümünə səbəb olan koronavirus yenidən Avropada qorxu yaratmağa başlayıb.

Medicina.az xəbər verir ki, Dünyada 7 milyondan çox insanın ölümünə səbəb olan koronavirus epidemiyası hazırda Böyük Britaniyada yenidən vüsət alıb.

Rəsmi məlumatlara görə, FLiRT olaraq da bilinən Covid-19-un yeni variantının alt variantı olan KP.3 aprel ayında ortaya çıxıb. Son vaxtlar bu virusa yoluxma hallarının sayı sürətlə artır.

2024-cü ilin aprel ayına olan məlumata görə, FLiRT variantı ölkədəki bütün Covid-19 variantlarının 40 faizini təşkil edib, xəstəxanaya yerləşdirilmə nisbətləri isə 22 faizdən 24 faizə yüksəlib.

Digər tərəfdən İngiltərə Səhiyyə Təhlükəsizliyi Agentliyi kişilərin qadınlara nisbətən bu xəstəliyə daha çox yoluxduğunu açıqlayıb.

İyunun 1-dən iyunun 19-dək bu virusa yoluxan qadınların sayı hər 100 000 nəfərə 3,63, kişilər üçün isə 3,88 olaraq qeyd edilib. İyunun 17-dək bu rəqəm hər 100 min nəfərə 4,4-ə çatıb.

İngiltərə mətbuatına danışan Leeds Universitetinin professoru Stiven Qriffin “Yeni Covid-19 dalğasının yarandığını” bildirib.

“İndiki vaksinlərin yayılan viruslara təsiri qeyri-müəyyəndir”, - deyə o qeyd edib.

Səlahiyyətlilər yeni Covid-19-un simptomlarını aşağıdakı kimi sıralayırlar:

- Yüksək hərarət və titrəmə

- Uzun müddət davam edən öskürək

- Dad və qoxu itkisi

- Nəfəs darlığı

- Yorğunluq

- Bədən ağrısı

- Baş ağrısı

- Boğaz ağrısı

- Burun tutulması və ya burun axması