Kompüter başında çox vaxt keçirənlər üçün gözləri qorumağın 7 yolu
- 2024.07.03 14:16
- 445 Baxış
Araşdırmalar göstərib ki, müntəzəm olaraq kompüter və digər oxşar cihazlardan istifadə edən insanların 56 faizində rəqəmsal göz yorğunluğu əlamətləri müşahidə olunur.
Medicina.az xəbər verir ki, simptomlara göz yorğunluğu və narahatlığı, gözlərdə quruluq, baş ağrıları, bulanıq görmə, boyun və çiyin ağrısı, gözlərin səyirməsi və göz qızartısı daxildir.
Bu simptomların qarşısını almaq üçün aşağıdakı qaydalara əməl etməlisiniz:
Əksolunmanı aradan qaldırın!
Divarlardan və cilalanmış səthlərdən əks olunan işıq, eləcə də kompüterinizin ekranındakı əksolunma da gözləri yora bilər. Bunun üçün ekranınıza parıltı əleyhinə filtr quraşdırmağı sınaya bilərsiniz.
Ekranın keyfiyyətini yüksəldin!
Köhnə CRT ekranlar kompüterin yaratdığı göz yorğunluğunun əsas səbəbi ola bilər. Bu cür ekranlarda nəzərə çarpmayan titrəmələr olur. Bunlar hiss olunmasa belə, kompüterdə işləyərkən gözlərin yorulmasına gətirib çıxarır. Monitorun yeniləmə tezliyi 75 Hertz-dən aşağı olarsa, titrəmə nəticəsində yaranan fəsadlar daha da çox olur.
Ekranın parlaqlığını tənzimləyin!
Ekranınızın parlaqlığını otaqdakı işıqla balanslaşdırmalısınız. Bu, ekran işığını ətrafdakı işığa ən yaxın səviyyəyə çatdırmaqla əldə edilir.
Xüsusilə uzun sənədləri oxuyarkən və ya hazırlayarkən rahatlıq üçün mətn ölçüsünü və kontrastı tənzimləməyi də unutmayın.
Ekranda mavi işığın da miqdarını azaldaraq göz problemlərini azalda bilərsiniz.
Tez-tez göz qırpın!
Tədqiqatlar göstərir ki, insanlar ekrana baxarkən daha az göz qırpırlar. Bu, normaldan üçdə bir nisbətində daha az baş verir. Gözü qoruyan göz yaşı gözün qırpılmadığı fazalarda daha tez buxarlanır, bu da göz quruluğuna səbəb olur. Bundan əlavə, əksər ofis mühitlərində hava qurudur və quru göz problemləri üçün əlverişli şərait yaradır.
Gözlərinizi məşq etdirin!
Daim ekrana fokuslanmaq gözlərinizi daha çox yora bilər. Bu riski azaltmaq üçün ən azı hər 20 dəqiqədən bir başqa tərəfə baxın və ən azı 20 saniyə uzaqdakı obyektə baxın. Bəzi oftalmoloqlar bunu “20-20-20 qaydası” adlandırırlar. Uzağa baxmaq yorğunluğu azaltmaq üçün gözün içərisindəki fokus əzələsini rahatlaşdırır.
Başqa bir məşq: uzaq bir obyektə 10-15 saniyə baxın və sonra yuxarıdakı bir nəsnəyə daha 10-15 saniyə baxın. Daha sonra yenidən uzaq obyektə baxın və bu prosesi 10 dəfə təkrarlayın.
Fasilə verin!
Göz problemlərini, eləcə də boyun, bel və çiyin ağrılarını azaltmaq üçün işləyərkən tez-tez fasilə verin. Bu fasilələr hər saatın əvvəlində ən azı 10 dəqiqə ola bilər. Bu fasilələr zamanı ayağa qalxın, hərəkət edin və gərginliyi, əzələ yorğunluğunu azaltmaq üçün qollarınızı, ayaqlarınızı, kürəyinizi, boynunuzu və çiyinlərinizi rahatlaşdırmağa çalışın.
Kompüter üçün eynəklərindən istifadə edin!
Maksimum rahatlıq üçün kompüterdən qoruyucu eynəklərdən istifadə edə bilərsiniz. Kompüter eynəkləri üçün bifokal linzalardan və ya proqresif linzalardan istifadə edirsinizsə, yanlış yoldasınız. Bu eynəklər ümumiyyətlə kompüterinizin ekranından olan məsafəyə uyğun gəlmir. Rəqəmsal cihazların yaydığı potensial zərərli mavi işığa məruz qalmağı azaltmaq üçün kompüterdə istifadə üçün fotoxrom linzalardan və ya bir qədər rənglənmiş linzalardan istifadə etməyə cəhd edə bilərsiniz.
Aysel
Ən Çox Oxunanlar
Yeni Xəbərlər
