Hacı Nuranın “xərçəng şou”su və ya batan hospitaldan səhiyyəyə “poni şıllağı”- Ekspertləri də şoka salan olay
- 2018.06.25 15:51
- 34044 Baxış
Hacı Nuran kimi tanınan məşhur teleaparıcı Nuran Hüseynovda son günlərdə ağciyər xərçəngi tapıldığı və vəziyyətinin ağır olduğu xəbəri yayılıb. Daha əvvəl də xərçəng xəstəliyindən əziyyət çəkən və Almaniyada ağır müalicə kursları keçdikdən sonra sağalıb, vətənə dönən Hacı Nuranda yenidən xərçəng tapıldığı xəbəri isə bu dəfə müzakirəsiz ötüşmür.
Medicina.az BakuPost-a istinadən xəbər verir ki, aparacının müalicə aldığı forma və şərait insanlarda onun həqiqətən də xəstə olduğuna dair şübhələr yaradıb. Hacı Nuranın bu addımının "müalicə aldığı” "Ege Hospital”ın piar kampaniyası olduğu iddia edilir. Əslində, bu iddiaları gücləndirəcək məqamlar da az deyil.
BakuPost bu iddiaların nə qədər doğru ola biləcəyini araşdırıb:
1. Azərbaycanda xərçəng xəstəliyinin müalicəsi ilə demək olar ki, yalnız Milli Onkologiya Mərkəzininin həyata keçirdiyi, bu sahənin qeyri-rəsmi olsa da, bu tibb ocağının nəzarətində olduğunu az qala hamı bilir. Hacı Nuran kimi nüfuzlu və imkanlı şəxs əgər doğrudan da müalicə olunmaq istəsəydi, onda xərçənglə bağlı peşəkarların çalışdığı və bu sahədə ixtisaslaşmış bir ünvana üz tutardı. Nəinki həkim səhlənkarlığına görə ölümləriylə daim gündəmdə olan, reputasiyası tamamilə korlanmış bir özəl xəstəxanaya...
2. Ağciyər xərçənginə tutulmuş şəxsin qorunmalı olduğu iki əsas təhlükə var: toz və tük. Hər iki detal Hacı Nuranın otağına gətirilən yüzlərlə gül və atla pozulub. İkinci detalı sosial şəbəkələrdə tanınmış tibb mütəxəssisləri də yazır. Bildirilir ki, Hacı Nuranın bu formada ziyarət edilməsi onu göstərir ki, "Ege Hospital” rəhbərliyi ya səriştəsizlik gösətərərək xəstəsinin ölümünü sürətləndirir, ya da Nuran Hüseynov xərçəng xəstəsi deyil və bütün bunlar sadəcə və sadəcə adıçəkilən xəstəxananın reklamına hesablanmış ucuz piar kampaniyasıdır.
Bu iddianı gücləndirən məqamlara da diqqət çəkək:
1. "Ege Hospital” Bakıda uzun illər "Grand Hospital” adı ilə fəaliyyət göstərib. Xəstəxana elə bu ay adını dəyişib. Bununla yanaşı, "Grand Hospital” adı altında işlədiyi dövrdəki bütün həkim heyətini də xəstəxanadan məcburi qaydada, qanunsuz şəkildə işdən qovublar. Diqqətli oxucular bu barədə elə həmin həkimlərin şikayətlərini BakuPost-da oxuduqlarını xatırlayacaqlar.
"Grand Hospital”da yeni direktorla həkimlər arasında qarşıdurma - Tanınmış həkimlər getdi
"Ege Hospital”dan daha 26 həkim, onlarla tibb işçisi məcburi işdən çıxarıldı - ŞOK TƏHDİD/ SİYAHI
2. "Grand Hospital” qəfildən adını və bütün həkim heyətini ona görə dəyişdirdi ki, uzun müddətdir, burada çoxsaylı xəstələr müxtəlif əməliyyatlar zamanı dünyasını dəyişmişdi. Xəstəxana demək olar ki, tamamilə nüfuzsuz hala düşmüşdü və müxtəlif məhkəmə çəkişmələrində idi. Üstəlik, elə bu ilin əvvəlində Vergilər Nazirliyi "Grand Hospital”da vergidən yayınma ilə bağlı araşdırma aparmışdı. Bütün bunları nəzərə alanda məlum olur ki, "Ege” keçmiş adıyla "Grand hospital”ın "Hacı Nuran şou”sunun altında bir reklam kampaniyasının dayanması mümkündür.
Bəs Azərbaycanda kifayət qədər nüfuzu və imkanı olduğu bilinən Nuran Hüseynov bu ucuz reklam kampaniyasına niyə qoşulub? Onu buna nə vadar edib?
"Ege Hospital” rəhbərliyi sosial şəbəkələrdə yayılan bu iddialarla, Hacı Nuranın palatasına at gətirilməsi ilə bağlı aşağıdakı açıqlamanı yayıb: "Bu addım Hacının istəyi idi. O, ağır xəstədi, ponini görmək istəyirdi. Deyirdi ki, əgər yanıma at gətirilməsə, mən özüm onun yanına gedəcəyəm. Ağır xəstənin kiçik arzusunu yerinə yetirmək savabdır. Hacı Nuran Atçılıq Mərkəzi ilə də çalışır. Hacı Nuranın orda öz atı var. Bu poni onundur, adı da Nazlıdır. Hacı Nuran hər gün gedib, atı görürmüş. İcazə olmazdı atı gətirməyə, amma Hacı Nuran kimi xeyirxah insanın bu məqamda arzusunu yerinə yetirmək üçün belə bir addım atıldı. Bir də, Hacı Nuranın yatdığı mərtəbədə ondan başqa xəstə yoxdur. Həmin poni də gigiyenik cəhətdən təmiz idi. Atı çirkli-çirkli gətirməmişik".
Hospital rəsmisi Türkan Məmmədli xəstənin yanına gələn şəxslərin ayağında baxil olmamasına da münasibət bildirib: "Xəstəxananın içəri girişində ayaqqabı üçün xüsusi yapışdırıcı avadanlıq var. Həmin o aparatla ayaqqabıların altına baxili əvəz etmək üçün xüsusi maddə yapışdırılır".
Bütün bu iddiaların hansının doğru olduğunu ayırd etmək isə əlahəzrət oxucunun öhdəsinə qalır. Özümüzü bu məsələnin hansısa xəstəxananın reklamı olmadığına inandırmağa çalışaq, əks halda, bir insanın öz ölümcül xəstəliyi üzərindən reklamla və pul qazanmaqla məşğul olduğunu qəbullanmaq daha çətin olar.
Ümid edirik, Hacı Nuran da tezliklə müalicəsini bitirər və bu ağır xəstəliyi atladar. Əgər həqiqətən də xəstədirsə…
Ən Çox Oxunanlar
Yeni Xəbərlər
