Gicitkən kimlər üçün zərərlidir? – İstifadə etməzdən əvvəl iki dəfə düşünün!
- 2024.07.25 21:13
- 1455 Baxış
Ümumilikdə gicitkənin 50-dən çox növü məlumdur. Onlar əsrlər boyu xalq təbabətində və kulinariyada istifadə edilib.
Medicina.az xəbər verir ki, “Gemotest” laboratoriyasının ekspert həkimi Roman İvanov “İzvestiya”ya gicitkənin müasir həyatda necə istifadə edildiyini və onun kimlərə zərər verə biləcəyini açıqlayıb.
“Gicitkən çoxillik çiçəkli bitkidir, sancma xüsusiyyəti ilə məşhurdur. O, dəri ilə təmasda yanma, qaşınma və qızartıya səbəb olur.
Bu bitkinin yarpaqlarında A, C və K vitaminləri, həmçinin dəmir, kalsium, maqnezium kimi minerallar var. Yarpaqlar, həmçinin faydalı antioksidantlar, flavonoidlər və karotenoidlər ehtiva edir. Belə zəngin tərkibi sayəsində gicitkən müalicəvi xüsusiyyətlərə malikdir”, - deyə həkim qeyd edib.
Onun sözlərinə görə, gicitkən artrit, xoşxassəli prostat hiperplaziyası və ürək çatışmazlığının müalicəsində faydalıdır.
“Gicitkən iltihabı azaldır, qan təzyiqi və qan şəkərinin səviyyəsini normallaşdırmağa kömək edir. Bu da diabetli insanlar üçün xüsusilə vacibdir. Gicitkən həm də hemoglobinin səviyyəsini artırır və immunitet sisteminə ümumi gücləndirici təsir göstərir”, - deyə həkim bildirib.
Onun fikrincə, bütün bu təsirlər üçün gicitkəni çay kimi dəmləyib içməklə əldə edilə bilər.
“Bundan əlavə, gicitkən yarpağı ekstraktı saç baxımı üçün istifadə olunur. Onu qaynadıb əldə etdiyiniz su ilə saçlarınızı durulaya bilərsiniz. Gicitkən yarpaqlarının dəmləmələri saç follikullarını gücləndirir, saç tökülməsini azaldır və kəpəyin qarşısını alır”, - mütəxəssis diqqətə çatdırıb.
Bununla belə, mütəxəssisin xəbərdar etdiyi kimi, aktiv maddələrin çox olması səbəbindən gicitkən hər kəs üçün uyğun deyil:
“Bəzi insanlarda onun daxili və ya xaricdən istifadəsi allergik reaksiyaya və həzmsizliyə səbəb ola bilər.
Həm tərkibində gicitkən olan preparatlar, həm də bitkinin yarpaqları ciddi allergik reaksiya yarada bilər. Tipik olaraq, təmas zamanı yaranan allergiya dəridə şiddətli qaşınma və səpgilərlə nəticələnir. Yuxarı tənəffüs yollarının şişməsi də inkişaf edə bilər ki, bu da boğulma ilə nəticələnəcək. Yüngül allergik reaksiyaların qarşısı antihistaminiklərlə alına bilər. Dərman qəbul etdikdən sonra 10-15 dəqiqə ərzində vəziyyət yaxşılaşmırsa, nəfəs darlığı artır və ümumi sağlamlıq pisləşirsə, təcili yardım çağırmalısınız”.
Həkim gicitkəndən daxili istifadə zamanı mədə-bağırsaq sisteminin selikli qişasının qıcıqlanması halının da baş verə biləcəyini söyləyib:
“Bu da mədə yanmasına, qarın ağrısına, ishala səbəb olur”.
O, gicitkənin hamilələr üçün təhlükəli ola biləcəyini nəzərə çatdırıb. Çünki vaxtından əvvəl doğuşa səbəb olması mümkündür.
“Gicitkən yarpaqlarında yüksək miqdarda oksalat turşusu olduğundan böyrək xəstəliklərində istifadəsi də tövsiyə edilmir. Böyrək daşlarının əmələ gəlməsinə səbəb olur.
Gicitkən bəzi dərmanların müalicəvi təsirini gücləndirə bilər. Məsələn, onu qan durulaşdırıcılarla birlikdə istifadə etmək tövsiyə edilmir.
Ümumiyyətlə, hər hansı bir bitki mənşəli dərman istifadə etməzdən əvvəl həkiminizlə məsləhətləşməlisiniz. Yalnız bir mütəxəssis bütün sağlamlıq xüsusiyyətlərini nəzərə ala və bitki mənşəli dərmanların mümkün zərər və faydalarını qiymətləndirə bilər”, - deyə İvanov vurğulayıb.
Aysel
Ən Çox Oxunanlar
Yeni Xəbərlər
