Enerji içkilərinin yaratdığı 4 qorxunc sağlamlıq problemi
- 2024.06.12 10:24
- 717 Baxış
Enerji içkiləri səhər tezdən və ya nahardan sonra əhvalınızı yüksəldə bilər, lakin elm adamları onların ciddi sağlamlıq problemləri ilə də əlaqəli olduğunu aşkar ediblər.
Medicina.az xəbər verir ki, məşhur enerji içkilərinin tərkibində 150 mq-a qədər kofein ola bilər ki, bu da südsüz qəhvədən təxminən iki dəfə çoxdur.
Enerji artıran bu içkilər əsasən də gənclər arasında çox populyardır.
Bununla belə, tədqiqatlar göstərir ki, enerji içkilərinin çox tez-tez istehlak edilməsi ürək fəsadlarından xərçəng riskinin artmasına və hətta depressiyaya qədər ciddi nəticələrə səbəb ola bilər.
Mütəxəssislər enerji içkilərinin insan sağlamlığını təhdid edən 4 problemə səbəb olduğunu açıqlayıblar:
Qəfil ürək dayanması
Həkimlər xəbərdarlıq edir ki, enerji içkiləri genetik ürək xəstəliyi olan insanların həyatı üçün təhlükə yarada bilər. Bunun səbəbi, enerji içkilərinin potensial olaraq ürəyin elektrik sistemini poza bilməsidir. Bu, aritmiya kimi tanınan anormal ürək ritmləri riskini artıra bilər.
Tədqiqatçılar bu riskin yuxu çatışmazlığı, susuzlaşma, pəhriz saxlamaq, siqaret və antibiotik terapiyası kimi digər həyat tərzi faktorları ilə birləşərək bəzi xəstələrdə qəfil ürək dayanmasına səbəb ola biləcəyini söyləyirlər.
ABŞ-ın Mayo Klinikasının alimləri apardıqları araşdırmada infarkt keçirən 144 xəstənin tibbi məlumatlarını araşdırıblar.
Yaşı 20 ilə 42 arasında olan 7 nəfər həyati təhlükə yaradan hadisədən bir müddət əvvəl enerji içkiləri qəbul etmişdi. Xəstələrdən üçünün daimi enerji içkisi istehlakçısı, dördünün isə bir növ genetik ürək xəstəliyi olduğu anlaşılıb.
“Heart Rhythm” jurnalında dərc olunan araşdırma enerji içkilərinin birbaşa ürək dayanmasına səbəb olduğunu sübut etməsə də, tədqiqatçılar hər ehtimala qarşı bu içkiləri normada istehlak etməyi tövsiyə edirlər.
Kolon xərçəngi
Enerji içkiləri təkcə enerji səviyyənizi artırmır, həm də xərçəng riskinizi artırır.
Bəzi ekspertlər enerji içkilərində şəkər və taurinin yüksək səviyyədə olduğunu və bu səbəblə kolon xərçəngi riskini artıra biləcəyindən şübhələnirlər.
Elm adamları bu tərkib hissəsinin, xüsusən də digər qruplara nisbətən daha çox enerji içkisi içməyə meylli olan gənclərdə kolon xərçənginin artımını qismən izah edə biləcəyini irəli sürürlər.
Ət, balıq və yumurtada çox rast gəlinən bir amin turşusu olan taurin bir çox enerji içkisinə əlavə edilir. Zehni performansı yaxşılaşdırmağa və enerji artımına kömək etdiyi deyilir. Taurin digər amin turşuları kimi bədəndə zülal yaratmaq üçün istifadə edilmir, lakin sinir hüceyrələrində kalsiumun miqdarını tənzimləmək və iltihabı idarə etmək də daxil olmaqla bir neçə rola malikdir.
Bununla belə, onun yoğun bağırsaq xərçəngi olan insanların bağırsaqlarında olan zərərli bakteriyaları qidalandırdığı və böyüməsini sürətləndirdiyi də iddia edilir.
Yuxusuzluq
Təəccüblü deyil ki, çox enerji içkisi içmək yuxunuzu poza bilər. Ancaq hətta həftədə bir neçə qutu enerji içkisi belə sizi sağlamlığınıza təsir edəcək qədər yuxudan məhrum edə bilər.
Bir araşdırma hər gün bu içkilərdən istifadə edən 18-35 yaş arası insanların ara-sıra və ya heç içməyənlərə nisbətən təxminən yarım saat az yatdığını aşkar edib.
Araşdırmalara görə, insan nə qədər çox enerji içkisi içirsə, gecələr bir o qədər az yatır və bu da gündüz yorğunluğuna səbəb olur. İçkilərin tərkibindəki yüksək kofein buna səbəb ola bilər.
Depressiya
Enerji içkiləri intihar cəhdlərinin artması ilə əlaqələndirilir. Bu, enerji içkilərinin uşaqlara təsirini araşdırmaq üçün 57 araşdırmanın nəticələrini tədqiq edən Teesside Universiteti və Nyukasl Universitetinin mütəxəssislərinin gəldiyi qənaətdir.
Tədqiqatlar 21 ölkədən 9-21 yaş arası 1.2 milyondan çox gənci əhatə edib. Yanvar ayında “Public Health” jurnalında dərc edilən nəticələr oğlanların qızlardan daha çox enerji içkisi istehlak etdiyini göstərib.
Tapıntılar, həmçinin bu içkilərin orta səviyyədən yuxarı bədən kütləsi indeksi (BMI), ürək ritm problemləri və yüksək qan təzyiqi də daxil olmaqla, zəif fiziki sağlamlığın bir sıra göstəriciləri ilə əlaqəli olduğunu ortaya qoyub.
Amma məşhur içkilərin gənclərin psixi sağlamlığına da təsir etdiyinə dair əlamətlər var. Enerji içkilərindən istifadə edən gənclərin psixi sağlamlıqlarının daha pis olduğu və daha çox narahatlıq, depressiya, qidalanma pozğunluğu və intihara cəhd göstərdiyi aşkar edilib.
Tədqiqat, həmçinin içkilərin zəif akademik performans, yuxu problemləri və qeyri-sağlam pəhriz riskinin artması ilə əlaqəli olduğunu müəyyən edib.
Aysel
Ən Çox Oxunanlar
Yeni Xəbərlər
