Döş xərçəngi müalicəsi Alzheimer riskini azaldır – Yeni araşdırma
- 2024.07.17 14:38
- 678 Baxış
Cənubi Karolina və Pitsburq universitetlərinin alimləri döş xərçəngi üçün hormon modulyasiya edən terapiyanın Alzheimer xəstəliyi riskini azaltdığını müəyyən ediblər.
Medicina.az xəbər verir ki, araşdırmanın nəticələri “JAMA Network Open” jurnalında dərc olunub.
Döş xərçəngi xəstələrinin təxminən üçdə ikisində estrogen və ya progesteronla qidalanan şişlər böyüyür.
Bunun qarşısını alan müalicələr hormonların səviyyələrini dəyişdirmək, istehsalını təqlid etmək və ya reseptorlarını bloklamaq üçün istifadə olunur.
Tədqiqatçılar 18 808 könüllü ilə aparılan araşdırmada hormon modulyasiya edən terapiyanın neyroprotektiv xüsusiyyətlərə malik olduğunu müəyyən ediblər.
2007-2009-cu illər arasında döş xərçəngi diaqnozu qoyulmuş qadınların sağlamlıq məlumatları təhlil edilib. Onların 66%-i hormon modulyasiya edən terapiyadan istifadə edib.
12 illik təqib zamanı hormon modulyasiya edən terapiya alan xəstələrin 24%-də Alzheimer xəstəliyi inkişaf edib. Digər müalicə üsullarından istifadə edənlər arasında bu göstərici 28% təşkil edib.
Tədqiqatçılar 65-74 yaşlı qadınlar arasında bu terapiyanın demensiyanın inkişaf riskini 24% azaltdığını müəyyən ediblər. Lakin 75 yaşa çatdıqdan sonra faydalı təsirlər aradan qalxıb.
Tədqiqatçılar deyirlər ki, hormon modulyasiya edən terapiya dərmanları beyində beta-amiloid adlanan neyronları zədələyən zülal yığınlarının əmələ gəlməsinin qarşısını ala bilər. Bu, həmçinin tau zülalının sabitliyini qoruyur və Alzheimer xəstəliyindən qoruyan beyin damarlarının sağlamlığını yaxşılaşdırır.
Aysel
Ən Çox Oxunanlar
Yeni Xəbərlər
