Azərbaycanda serialların çəkilişi dayandırıldı- SİYAHI

2020.03.19 18:08
2282 Baxış

Sürətlə yayılan koronavirus infeksiyası təkcə insanların səhhətinə yox, həm də iş həyatına da təsir edib.

Dünyada bir çox tədbirlər, konsertlər təxirə salınıb, iş yerləri fəaliyyətini müvəqqəti dayandırıb və ya çalışma saatlarını azaldıb. COVİD 19 infeksiyası film sahəsinə də təsirsiz ötüşməyib. Bir çox ekran işinin çəkilişləri dayandırılıb, təqdimat mərasimləri ləğv edilib. Bəs görəsən, Azərbaycanda serial, film sahəsində koronavirusla bağlı hansı tədbirlər görülüb?

Medicina.az xəbər verir ki, Axşam.az məsələ ilə bağlı serialların çəkiliş komandaları arasında sorğu aparıb.

Məlum olub ki, “Xəzər” TV-də yayımlanan “Ata ocağı” və “İmtahan” seriallarının çəkilişi müvəqqəti olaraq dayandırılıb.

Verilən açıqlamada bildirilir ki, çəkilişlərin dayanmasının səbəbi koronavirus deyil:

“Çəkilişləri martın 26-na kimi saxlamışıq. Bizə hər hansı göstəriş gəlməyib. Dayanmağımızın səbəbi isə koronavirus deyil. Bayrama görə müvəqqəti ara verilib. Çəkiliş zamanı komanda spirt, maska və digər gigiyenik vasitələrlə təmin olunub”.

ATV-də yayımlanan “Ailəmiz” serialının isə çəkilişləri davam edir. Ekran işində Xalq artistləri Firəngiz Mütəllimova, Fatma Mahmudova, aktyor Əlibəy Məmmədli və aktrisa Sevinc Əliyeva baş rolları oynayır.

ATV-nin digər serialı “Yuxu kimi”nin isə ilk 20 bölümü əvvəlcədən çəkilib. Lakin növbəti günlərdə Rövşən İsaxın ekranlaşdırdığı serialın çəkilişi planlaşdırılsa da, koronavirus səbəbilə təxirə salınıb.

Burada isə baş rolları İbrahim Çingiz və Aysel İbrahimova canlandırır.

“Qız atası” serialının komandası isə iş başındadır. Koronavirus onların çəkiliş prosesinə təsir etməyib.