20 gün komada qalan 9 aylıq körpə xilas edildi - FOTO
- 2022.10.20 11:53
- 1967 Baxış
Yaşadıqları binanın ikinci mərtəbəsində yıxılan, 20 gün koma vəziyyətində olan 9 aylıq körpənin həyatı xilas edilib.
Medicina.az xəbər verir ki, Kliniki Tibbi Mərkəzə gətirilərkən olduqca ağır və huşsuz vəziyyətdə olan körpədə beyin ocaqlarında ciddi dəyişiklik olduğu, ağır kəllə-beyin travması aldığı müəyyən edilib.
Mərkəzin Reanimasiya şöbəsinin müdiri Ülviyyə Qurbanovanın sözlərinə görə, körpə 20 gün süni tənəffüs aparatında qalıb və yalnız bu şəkildə müvafiq müəlicələrinin aparılması mümkün olub.
“Körpə 20 sentyabr ağır kəllə-beyin travması diaqnozu ilə xəstəxanaya yerləşdirilib. Mədəciklərdə qan sızma, aşağı saturasiya, alın-təpə payında böyük hemoridik əzilmələr, tənəffüsdə pisləşmə olduğu üçün intubasiya edilərək, süni tənəffüs aparatına qoşulub. Daha sonra portativ süni tənəffüs aparatı ilə KT müayinəsi edildikdən sonra xəstənin cərrahi əməliyyata ehtiyacı olmadığı müəyyənləşib. Amma buna baxmayaraq, ağır kəllə beyin travması və əzilmələr müşahidə edildi. 20 gündən sonra tənəffüsdə sabitləşmə və huşunda yaxşılaşma qeydə alınmağa başladı. Bu səbəbdən xəstə süni tənəffüs apartından ayrıldı və ekstubasiya edildi. Artıq 10 gündür ki, xəstə spontan tənəffüs alır, analiz nəticələri müsbətdir. Hazırda nevropatoloq müayinəsi davam etdirilir”.
Körpənin anası Güllü Mirzəyevanın dediklərinə görə, körpəmin həyatda qalması bir möcüzədir.
“Binamızın 2-ci mərtəbəsindən qızım aşağı yıxıldı. Körpəni dərhal özəl xəstəxanalardan birinə apardıq. Bizi qəbul etmədilər. Daha sonra körpəni Kliniki Tibbi Mərkəzə çatdırdıq. Çox şükür ki, bura gəlmişik. Buradakı həkimlərin sayəsində uşağımız yaşayır. Onlara çox minnətdarıq. Bir aydan çoxdur ki, biz sanki bu xəstəxananın həyətində yaşayırdıq. Şükür bu günə…” (Ağlayır).
Məlumat üçün bildirək ki, körpənin bütün müalicə xərcləri icbari tibbi sığorta ilə qarşılanıb. Artıq vəziyyəti müəyyən qədər yaxşılaşan körpənin nevroloji sahə üzrə də müalicəsinin tamamlanması məqsədi ilə ötən gün Uşaq Nevroloji Xəstəxanasına köçürülməsinə qərar verilib.
Ən Çox Oxunanlar
Yeni Xəbərlər
